لنّا زمان ماأسمعنا زقيق الجبّر

ولا ناس روّادت ربيع أتخبّر

الأستاذ الشاعر/ حسن بوالدرديه المنصورى

لنّا زمااااااان

ماأسمعنا زفي حصّاده .. ولانجع قابل كي سبيل العاده

ولاأمهاصكت حرّاث لا ورّاده .. ولا ثلب هادي ع الغوارب دِبّر

ولا كاس يصدّع مع السنّاده .. ولاشاةَ مَربط ع المدود اتنبّر

ولامِق من منهِِل إشحِط شدَّاده..افرازه على قيس القناه امعبّر

ولاأتقول برمه رزّمَت فدفاده .. أحوارها أروِي دوبه سند يشّبر

لنا زماااان

ماأسمعنا ولا مخبوره .. ولا نار مغرب قابلت مكبوره

ولا قِدر بلمرواد هدّوا فوره .. يطّافر مع مَقسم غديد امهبّر

ولابنت جلاّسه دقيق الحوره .. ولا طفل ناهي فى النخيل إيوبّر

ولا فقيه طيب جرّته مشكوره .. بدواية الوذح خط الحراز امحبّر

ولاعزوز صيفيها إذهب مقهوره .. كان ماكمَت سالت عليه اتشبّر

لنّا زماااااان

مارينا منازل ضاري .. لاضان دبكه لا حنين بكاري

ولافطام يصّايح دلال الشاري .. سيدها على سوم التْجار اجّبّر

ولاأجواف دابغهن أشبوب بداري .. دبلهن وهن كانن عجاج امغبّر

ولا محاس خايلّه جناح ابحاري .. بزَّاره على دِرق المبات امحبّر

ولا ربيع شالوله عرب ع الطّارى .. همّزهم على شدّ الرحيل ايدبّر

فقيهم على علم الزوايا قاري .. على وقت ميجاب الصلاه ايكبّر

لنّا زمااان

ماأسمعنا قذير أجلامه .. ولا حشو متشاوش نهار اوسامه

ولا بيت نشو امعقّلات ارمامه .. امبتـّت بعبّادى وهدب اموبّر

ولاكحيل مطّرغل صهل قدّامه .. قصير قين جالط ف الّطام امنبّر

إيبان من بعيد تقول دمّ أحجامه .. رفيع الشوايا بـ السّواد امجبّر

وفوقه ولد باهي رفيع مقامه..لايعلّ بطّاله ولا يتكبّر

إمنسّب ولد شايب عليه أعمامه .. إيقرّط لكم خايب أنكان تخبّر

سريب خطّره شاعر لذيذ كلامه .. على وصف عدّا فـ الحياه ايعبّر

شغلنى مشيت أمعاه فى برّامه .. انريده إيصبّرنى وهو يصّبّر