يا ما عليه بكينا

مشاركة الشاعرة فاطمه عبدالله فى

قصيدة ياما عليه شعرنا للشاعر مفتاح اسويري.

يا ما عليه شعرنا

لا قول جابه لا بلاه صبرنا

قديم الغلاً

يا ما عليه بكينا

لا دمع جابه لا عليه إسهينا

حتى الغرب في غيبته شاكينا

لا جل فراقه في الحياة قهرنا

كملنا دموع بشوقنا راجينا

طال صبرنا نين ماعليه قدرنا

لا هو اللى جاب العزيز علينا

ولا با يهون اللي سكن خاطرنا

يا ما عليه دموع

كبن مواقينا وجن في الطوع

سالن علي فرقاه دارن نوع

ويا ما اشعار الشوق له سطرنا

وما من مهاياه وسهر وولوع

لا يندري لا سال فيه سهرنا

ولا هو معانا حاسّ بالموضوع

لا فيه فكر كيف مافكرنا

يا ما عليه انهلنا

با شعارنا وسمح الغناوي قلنا

نريدوا زهاه و بالجفا زعلنا

وردنا رضاه وما ارضي هاجرنا

صاعب فراقه هاسنا بهدلنا

ذبل حالنا غيب معاه قمرنا

العين سامره والعقل فيه أوحلنا

تعبنا معاه وفيه ياما درنا

يصبر أسويري ماأقدر هبَّلنا

وبينا وبين اللي عزيز احترنا