كادنى نسيانك
للشاعر/ فرج بالحمد
كادنى نسيانك
حتى وانت جافى خاطرى ما هانك
مازلت تخطر
كادني انزابيك
واللي كادني النسيان بي اوبيك
ساعة انقول انسيت لمس ايديك
نلقى سلامي في ورود اجنانك
ونلقى العقل اللي زما ن أ وغويك
مازال غاوي في زمان زمانك
ومازال عندي دمع كي نطريك
ينهال من توقة ابروق امزانك
ومازال عندي جرح لو يوفيك
ما يريد غير الود لي واحسانك
مازلت بين اعيوني
مازلت في شدة لهب مكنوني
مازلت بين الشك بين اظنوني
امرايف عليك وفاقدين حنانك
مازلت روقات الدموع او عوني
ومازلت نقرا في علل ديوانك
ومازلت ليل طويل داخل كوني
وما زلت ما ندفا بلا نيرانك
كادنى نسيانك
حتى وانت جافى خاطرى ما هانك
مازلت تخطر
ــــــــــــــــــــــــــــــــــــــــــــــــــ
ليست هناك تعليقات:
إرسال تعليق