ودك الراجل باهيات افعاله
ودّك الراجل باهيات افعاله
ودّك الراجل باهيات أفعاله ****
عزيز نفس مايرضي إللي بطاله
عزيز نفس صاحب همّه***
وطول الحيا ماعمر والي ذمّه
((مربوعته ))فيها العرب ملتّمه ***
وكان غاب عنهم ينشدو عن حاله
معروف فعل الخير كله لمّه ***
ولد بيت فارس خيرة الرّجاله
معروف عنده هيبه ***
وفي الضيق ماعمره إنسيه حبيبه
ويجود ما يبخل بما في جيبه ***
مشهور بين الناس هذا حاله
سقيم عقل ماتصعب عليه صعيبه ***
ويخدم علي رزقه ورزق إعياله
نفسه كريمه ما ايدير العيبه ***
وعصران ماياكل إمغير حلاله
صاحب وفا ديما وعز وطيبه ***
قايم فروضه وصادقات أقواله
ديما نضيف السيره ***
العيب والخطا لايعرفه لا يديره
ولايوم بالسيه إيكافي غيره ***
ولا ايضّر ولا تغضب الناس أفعاله
ربي عطاه العرف والتدبيره ***
وزاد في علومه وزاد في ماله
رفيع شوف له غيريه ***
معروف صيته والعزوم قويه
جود وشهامه وليدين سخيه ***
وفي الكرب يفزع موش م الذلاله
ربي الكريم إيعينه ***
هلي كسب قوته بكد إيمينه
عزيز نفس ما يرضي إيدير الشينه ***
وصيته كما بوزيد واسع باله
عارف وفاهم فرايض دينه ***
وحامد وشاكر ربنا وأفضاله
بالخير ديما بادي ***
لا إيعيب لاعمره الناس إيعادي
واخد راضا والديه فاول بادي ***
جميع مايريده في حياته ناله
هدايات من رب الكريم الهادي ***
عليه لمواير باينات إقباله
ليست هناك تعليقات:
إرسال تعليق